Ulitawo nakuhaan og 20 ka pakete sa 'shabu'

Kris C. Sialana

MOKABAT ngadto sa 20 ka mga pakete sa gituohang shabu ang nakumpiska gikan sa usa ka ulitawo human nasikop pinaagi sa search warrant Martes sa buntag, Septiyembre 12, sa Ramonal Village, Barangay Camaman-an, dakbayan sa Cagayan de Oro.

Nasikop ang suspek nga si Armando Geneses, 27, ulitawo ug residente sa nahisgutang dapit.

Gikabutyag sa kapolisan nga malampusong nasikop ang suspek pinaagi sa search warrant nga gi-tunol sa mga otoridad gikan sa Police Station 9 (PS9) sa Macasandig, City Intelligence Unit (CIU) ug ubang ahensiya.

Giingong atol sa operasiyon, nakuhaan ang suspek og mokabat sa 20 ka mga pakete sa gituohang shabu diin ang duha niini ang mga dagkong pakete ug 18 ka mga gagmay nga pakete sa shabu.

Gibana-banang mokabat sa P48 mil nga kantidad sa shabu ang nakumpiska gikan sa suspek.

Gibutyag sa kapulisan sa Macasandig nga taod-taod na matud pa nga nalambigit ang suspek sa ginadili nga druga hinungdan nga gipahigayonan kini sa operasiyon pinaagi sa search warrant.

Aminado usab matud pa ang suspek nga gapamaligya kini sa ilegal nga druga alang matud pa sa pagsuporta sa adlaw-adlaw nga panginahanglanon.

Samtang sa bahin sa suspek gi-angkon niini nga nalambigit kini sa pagpayuhot ug paggamit sa ilegal nga druga sa taod-taod na nga panahon apan gipanghimakak niini nga iyaha ang maong ubay-ubay ka mga pakete sa shabu nga nakuha sa kapolisan.

Sa pagsulat niini nga balita, padayon pa ang imbestigasiyon samtang ang suspek ang kasamtangang nagtingkagol na sa mini-cell sa PS9 sa Macasandig.