Pagtapos sa Minbizcon 2017 giintriga

TALIWALA sa dakong kalampusan sa Minbizcon 2017 nga bag-ohay lang natapos niadtong adlaw'ng Sabado, Septiyembre 9, aduna gihapon mga nakamatikod ug isyu nga napaabot.

Kini human si Cagayan de Oro City Councilor George Goking, kinsa chairman komite sa Trade and Commerce sa konseho, nipaabot nga wala siya nakadawat og imbistasyon gikan sa nag-organiza sa kalihokan nga mao ang Oro Chamber.

Matud niini nga dismayado siya tungod kay nahatagan og imbitasyon ang uban konsehal sa nagkalain-laing lugar sama sa Lanao del Sur, Iligan City ug lakip Bukidnon area.

Si Goking nidugang nga buot niya matin-awan nganong naingon niini nga wala siyay nadawat nga imbitasyon ug labaw sa tanan nigawas na usab dayon ang pagduda nga tungod kini sa pulitika human ang kagamhanan sa lokal sa probinsya ubos ni Misamis Oriental Yevgeny Emano ang usa sa sponsor sa kalihokan.

Gani lakip sa namatikdan sa kalihokan mao ang giingong wala gilakip og hatag si Mayor Moreno og garlan apan si Governor Emano lamang. Mireklamo sab ang pipila ka mga pulis nga wala nakakaon human sa kalihokan ug lakip ang mga personahe sa Roads and Traffic Administration.

Apan ang presidente sa Oro Chamber nga si Ruben Vegafria namahayag nga nasubo siya nga taliwala sa kalampusan sa kalihokan ug nakadawat og mga pagpahalipay aduna gihapon mga ingon niini nga nanggawas nga isyu.

Matud niiini nga tungod sa kadako sa kalihokan, naa gayud silay ma-miss ug dili nagpasabot nga kay dili imbitado ikamahay na dayon kini. Pasabot ni Vegafria imbitado si Mayor Oscar Moreno ug gani sponsor pa kini ug kini na ang maoy modala sa iyang mga tao sa kalihokan. Tungod sab niini dako ang pagpangayo niini og pasaylo sa mga niadtong wala naimbitahan.

Dugang ni Vegafria nga walay kamatuoran usab kining isyu sa garlan tungod kay tanan nga mga delegado ug mga politician nga mitambong adunay gyod garlan alang kanila.