Mga konsehal sa Oro gipaubos og drug testing

GIKALIPAY sa pipila ka mga miyembro sa konseho ang pagpaubos og drug testing niadtong adlaw'ng Lunes, Spetiyembre 11, atol mismo sa ilang sesyon sa hawanan sa konseho sa dakbayan sa Cagayan de Oro.

Gibutyag ni Bise Mayor Rainier Kikang Uy nga sunod kanila ang mga regular employees sa City Hall nga ipaubos gihapon og sorpresang drug testing.

Matud ni Uy nga ang konseho nagpakita og dakong suporta sa kang Presidente Rodrigo Duterte sa pakigbatok niini sa ginadili nga druga ug kinahanglan kining sugdan gikan kanila.

Giangkon sab ni Uy nga siya mismo nag-una sa drug testing.

Gani si konsehal Eric Salcedo ug si konsehal Teodulfo Lao ang wala nalakip tungod kay absent niadtong sesyon.

Si konsehal Romeo Calizo, chairman sa police fire and public safety sa konseho, nipaabot sab nga angayan sab masayod ang katawhan kung masaligan ba ang ilang gibotoran ug wala ba gyod nahilambigit sa ginadili nga druga.

Daw kung magnegatibo ang tanan dayag nga maayong ehemplo ang konseho sa dakbayan.

Dream come true sab alang kang konsehal Reuben Daba ang nahitabong drrug testing sa konseho tungod kay ang konseho maoy ehemplo sa kadaghanan.

Hulatan nalang ang resulta niini ug mosunod na usab dayon ang random drug testing ngadto sa mga regular nga empleyado. (SVB)