Lola nabanggaan og motor, kritikal

Kris C. Sialana

TALANDUGON ang kahimtang sa usa ka lola human nabanggaan sa motorsiklo kagahapon sa buntag diha sa Cabula, Barangay Lumbia, dakbayan sa Cagayan de Oro.

Kritikal ang kahimtang sa lola nga nailang si Nimfa Aligato, 61, minyo ug residente sa nahisgutang dapit.

Sa nahipos nga impormasiyon gikan sa Northern Mindanao Medical Center (NMMC) ning dakbayan diin gidala ang biktima, gikabutyag nga sigon na usab sa mga residente nga nakita na lamang ang maong lola nga nahagsa sa dalan human kini nabanggaan.

Wala’y insaktong detalye gumikan kay kalit ang panghitabo diin nabanggaan kini sa naghaguros nga motorsiklo nga gimaneho sa wala mailang responsable.

Nakaangkon ang lola og samad sa iyang ulo, paa ug sa nagkadaiyang parte sa kalawasan gumikan sa kakusog sa impak sa maong aksidente hinungdan nga anaa kini sa talandugon nga kahimtang sa pagdala sa NMMC.

Sa pagsulat niini nga balita, padayon pa nga gi-obserbahan ang biktima sa mga mananambal samtang gikabutyag nga anaa na kini sa luwas nga kahimtang.

Padayon pa usab ang kapulisan sa imbestigasiyon kalabot na sa natigayong insidente.