Miambak sa 8th floor pabiling wala maila

Kris C. Sialana

PADAYON pa nga wala maila ang usa ka lalaki nga mi-ambak gikan sa 8th floor, parking area sa Engineering Building sa tunghaan sa University of Southern Philippines (USTP), C.M Recto, dakbayan sa Cagayan de Oro.

Gibana-bana nga nagpangidaron sa 20 ngadto sa 25 anyos ang lalaki, kinsa nagsul-ob og kolor dark blue nga adidas nga pants ug T-shirt nga patig.

Nasayran nga nagpatala sa kapolisan ang guwardiya kinsa nailang si Security Guard Reymark human sa insidente.

Giingong wala matud pa usab kini makabantay sa lalaki kinsa nakasulod sa tunghaan.

Gibutyag ni Police Senior Inspector Gerry Ligan, deputy sa Police Station 3 (PS3) sa Agora, nga padayon pa usab ang ilang gihimong imbestigasiyon kalabot na sa insidente aron masuta kung unsa ang tinuod nga panghitabo ug kung nganong nakasulod ang lalaki nga unta istrikto man ang tunghaan.

Gisuta pa usab kung aduna’y mga kopya sa closed-circuit television camera kalabot sa panghitabo.

Gumikan sa kahabugon sa gi-ambakan sa biktima hinungdan sa hinanali niini nga kamatayon human makaangkon og grabeng bali sa kalawasan ilabi na sa pagkabuak sa mismong ulo niini.

Sa pagkakaron, pabilin pa nga wala maila ang lalaki kinsa pabiling nagpabilin sa Bollozos Funeral Homes sa Bulua ning dakbayan.