3 ka bakwit gipusil, patay

Kris C. Sialana

TULO ang patay samtang isa ang angol human gipamusil sa wala mailang mga suspetsado nga naka-bonnet mga alas 9:51 sa gabii niadtong Huwebes, Agosto 10, sa Purok-04, Barangay Tambacan, Iligan City.

Patay ang tulo ka mga biktima nga nailang si Aladin Piti-ilan Alnor Samporna, ug Salem Samporna samtang kritikal si Kikid Pitiilan.

Sa nahipos nga impormasiyon gikan sa kapolisan, gikabutyag nga samtang anaa sa maong dapit ang mga biktima kalit lang nga niabot ang upat ka wala mailang mga suspetsado.

Giingong gipamusil ang mga biktima sa mga suspetsado ginamit usab ang wala pa masuta nga klase sa armas kinsa pulos nagsul-ob og mask o bonnet.

Nakaangkon og samad pinusilan sa ulo ang mga biktima hinungdan sa hinanali nga kamatayon.

Samtang kritikal si Pitiilan human nakaangkon gihapon og samad pinusilan sa ulo ug daling gidala sa Gregorio T Lluch Memorial Hospital aron nga maatiman sa mga mananambal.

Nasayran nga ang mga biktima mga home-based evacuees nga gikan sa Bubong Ramain, Lanao del Sur.

Sa pagsulat niini nga balita, padayon pa ang kapolisan sa pag follow-up aron masuta ang motibo sa krimen.