Lalaki miambak gikan sa 8th floor sa unibersidad

PATAY ang usa ka lalaki human miambak gikan sa 8th floor sa Engineering building sa University of Science and Technology of Southern Philippines (USTP) alas 10 sa buntag niadtong Biyernes, Agusto 11, sa CM Recto-Lapasan, Cagayan de Oro.

Wala pay identipikasyon sa biktima sa pagsulat ning balita apan gihulagway nga adunay 5'6 ang katas-on, mga 40 anyos pangidaron, niwangon, pution ang pamanit ug bulaw ang buhok.

Ang biktima nagsuot og jogging pants nga kolor blue ug t-shirt nga adunay kolor nga camouflage.

Ang security personnel sa USTP nakurat sa panghitabo gumikan kay wala sila nakamatikod nga adunay misulod sa gate nga susama niini ug hitsura labina nga duna silay palisiya nga "No ID No Entry."

Gikumpirma sab sa mga personahe sa USTP nga dili kini tinun-an sa tunghaan.

Sa pagkahulog niini, nasangit pa kini sa sanga sa punoan sa kahoy tungod kay naputol ang sanga usa kini naglagapak sa naka-parking nga motorsiklo sa ubos nga bahin hinungdan sa labihang kakurat sa mga tinun-an.

Nakaangkon ang biktima og bali sa nagkadaiyang parte sa lawas diin nanggawas pa ang bukog niini ug gituohang naluno ang ulo.

Gisuwayan pa og dala sa Oro rescue team sa Northern Mindanao Medical Center apan nakabsan kini sa iyang kinabuhi sulod sa tambalanan.

Ang biktima padayon pa nga giila ang identipikasyon ning panahona nga gituohang sa likod mikatkat paingon sa sulod sa tunghaan.