Welga walay epek sa Oro

PIPILA ang nakamatikod nga wala kaayo nila nabati ang transport strike nga gipahigayon niadtong adlaw’ng Lunes, Hulyo 17, sa dakbayan sa Cagayan de Oro.

Mamatikdan nga padayon ang pamasada sa pipila ka mga pampublikong sakyanan.

Usa ka driver sa dyip nga si Roel Dago nibutyag sa SunStar SuperBalita nga wala siya nasayod niini ug kung aduna man strike, magpadayon gihapon siya sa pagpamasahero tungod kay kini lamang iyang panginabuhian sa adlaw-adlaw.

"Kung mohunong kag pamasayro, hunong pod atong kita ani karon nga adlaw. maayo man og binulan atong sweldo nga atong kita magdepende man kada adlaw nga biyahe," pasabot niini.

Si Jocelyn Oaminal, usa ka meastra, namahayag nga wala kaayo niya nabati ang strike tungod kay nakasakay siya og insakto ug wala nalangan paingon sa tunghaan nga iyang gitudloan.

Ang nangulo sa transport strike pag Lunes mao ang Pagkakaisa ng Samahan ng Tsuper at Operator Nationwide (Piston) kon Starex-Piston Northern Mindanao nga gipangulohan ni Ringo Lago kinsa Secretary General sa grupo.

Matud ni Lago nga susama kaniadto nga labihan ilang gihimong preparasyon sama sa pagbabag sa dalan, karon dili kini nila mahimo labina ubos sa martial law ang pulo sa Mindanao.

Daw basin sila ang makasohan kon mohimo gayod sila og dakong pwersa sa strike.

"Layo ra kaayo nang mga pagpangsabotahe ug kini atong gihimo programa lamang," matud ni Lago.

Hinuon gipaabot niini nga dako gayod silang supak sa gikatakdang pag-phase out sa mga dyip.

Ang National Confederation of Transport Union-Northern Mindanao, gibutyag ni Joel Gabatan nga unang-una wala sila nakapangandam sa transport strike hinungdan wala sila kasalmot niini.

Gawas niini, buot nilang dili mawad-an og panginabuhi ilang sakop labina gikinahanglan kini sa adlaw-adlaw.

Hinuon suportado nila ang Starex Piston nga supak sa pag-phase out sa mga dyip.