Patay'ng lawas sa NPA nakuhaan og armas

GIKUMPIRMAR ni First Lieutenant Erwin Bugarin, kinsa dako sa Civil Military Operations sa 8th Infantry Battalion sa 4th Infantry Division, Philippine Army nga usa ka sakop sa New People's Army (NPA) ang ilang napatay sa Barangay Mahayag, lungsod sa Quezon, Bukidnon.

Matud ni Bugarin nga nagpahigayon ang tropa og combat operation niaging adlaw sa naasoy'ng dapit dihang naengkwentro ang walhong grupo nga miresulta sa pagbinayloay og bala.

Sa pagkakaron, padayon pa nga gisuta kon kinsa nga sakop ang grupo.

Tungod sa walay puas nga binakbakay, mipalayo ang walhong grupo ug dihang nasundan sa mga sundalo, didto nila nakumpirma nga napatyan ang walhong pundok human usa ang nabiyaan sa encounter site.

Nakuha pa gikan sa patay'ng lawas ang usa ka M16 rifle.

Gidala na sa punerarya sa maong dapit ang patay’ng lawas ug gihulat nga i-claim kini sa iyang pamilya aron mahatagan og insaktong lubong.

Una na nga namahayag si Bugarin nga kung adunay engkwentro nga mahitabo, dili gayod mahimo nga itago nga adunay kaswalidad sa insidente gumikan kay ang mga kasundalohan tarong nga gapaila sa ilang identipakasyon ug dili gaalyas.

Daw kung mopaabot ang NPA sa kahanginan nga adunay ilang sakop nga namatay, kinahanglan kining iberipika gumikan kay posibleng himo-himo lamang kini sa grupo. (SVB)