Lola napalgang patay duol sa baka

Kris C. Sialana

NAGHAYANG ug wala na’y kinabuhi ang usa ka lola kinsa napalgan sa Barangay Bayanga, dakbayan sa Cagayan de Oro, Lunes sa buntag, Hulyo 17.

Ang biktimang patay naila nga si Regina Pat kinsa gibana-banang nag-edad og 80 kapin ug nag-inusara nga nagpuyo sa panimalay niini.

Gibutyag ni Felipe Ba-ang, kapitan sa Barangay Bayanga, nga nahanaw niadtong adlaw nga Sabado ang biktima human nga nanugway sa baka niini apan nakurat na lamang sa dihang nakita na kining wala na’y kinabuhi.

“Nawala ni adtong Sabado kay nanugway sa iyang baka unya nahibal-an sa mga silingan karong buntag gipangita kay wala pa gyud nakauli mao nang nakita karon nga naghayang na diri, abay sa iyang baka,” pahayag ni Ba-ang.

Gituohan sa mga residente nga posibleng naligid ang biktima kay medyo bakilid man ang maong dapit samtang ang uban nagduda kon wala ba kini nagapos sa pisi o gisungag sa mismong baka niini apan dili pa masuta ang tinuod nga hinungdan sa kamatayon sa biktima.

Sa pagsulat niini nga balita Lunes, ang inisdente ang gikataho na sa tinugyanan sa mga otoridad.

Gidala na ang patay nga lawas sa punerarya alang sa posibleng eksaminasiyon aron masayran ang tinuod nga hinungdan sa kamatayon niini.