Batan-on natripan kay hitsuraan

DUHA ka mga lalaki ang gipangluba samtang pasakay na sa motorsiklo sa Montalban/Velez Streets, dakbayan sa Cagayan de Oro.

Nakaangkon og samad dinunggaban sila si Troy (bansagon gitago), 23 ug si Clyde (bansagon gitago), 21, pulos taga Barangay Nazareth ning dakbayan.

Samtang nasikop ang usa sa mga suspek nga nailang si Ricardo Titogo, 20, ulitawo, taga Calaanan, Canitoan, kinsa hugot nga gipanghimakak ang alegasiyon.

Sa pakighinabi sa SunStar SuperBalita kang Auga (bansagon gitago), 24, taga Terry Hills, kinsa kauban sa mga biktima, nga nakurat na lamang kini sila sa dihang kalit nga gidunggab sa mga suspek ang mga biktima samtang nagtalikod kay pasakay na sa motorsiklo.

Giingong lima sila nga nag-uban apan ang duha sa ilang mga kauban ang nadunggaban.

Namatikdan na niini nga gapamikil ang mga suspek human nga naglingkod-lingkod sa ilang motorsiklo apan gibalewala lang niini aron nga makalikay sa kagubot.

Wala’y laing pagduda ang biktima ug giingong natripan lang kini sila ug posible kini silang gikasuyaan bisan pa man og wala kini sila gihimo.

Nakuha sa posisyon sa suspek ang usa ka stainless nga kutsilyo nga adunay gitas-on nga mga siyam ka pulgada. (KCS)