Ulitawo gitabangan og dunggab, kritikal

Kris C. Sialana

GUBA ang dagway sa usa ka ulitawo kinsa talandugon ang kahimtang human nga gitabangan og kulata dayong dunggab sa mga wala mailang suspetsado sa Cogon Market, dakbayan sa Cagayan de Oro.

Kritikal si Jasson Pacala, 20, ulitawo, taga Libertad, Misamis Oriental human nakaangkon og mga samad sa nagkadaiyang parte sa kalawasan.

Sa nahipos nga impormasiyong gikan sa Northern Mindanao Medical Center (NMMC) ning dakbayan diin gidala ang biktima, giingong samtang anaa sa merkado ang biktima kalit lang kining giduolan sa grupo sa wala mailang mga suspetsado.

Gituohang natripan ang ulitawo ilabi na kay dili kini residente sa dakbayan hinungdan nga gitabangan sa pagkulata ug di pa igo gidunggab-dunggab pa kini ginamit ang wala masuta nga klase sa hinagiban.

Nakaangkon si Pacala og samad sa iyang ulo, nawong lakip na samad dinunggaban sa iyang wala nga kilid ug dughan hinungdan nga padayon kining nakigbugno karong panahona sulod sa tambalanan.

Sa pagkakaron, padayon pa nga gi-obserbahan sa mga mananambal ang biktima samtang gawasnon pa ang mga suspetsado.