P45 mil nga cellphone nabawi gikan sa isnatser

Kris C. Sialana

NAGTINGKAGOL na sa Maharlika Detention Cell (MDC) ang usa ka manglabnihay human nga nasapon kini sa mga kapolisan nga nanglabni og mahalong cellular phone ug nakuhaan pa og shabu sa Tiano-Gaerlan Streets, dakbayan sa Cagayan de Oro.

Ang suspek nailang si Jet Mark Baylon, 27, minyo, taga Zone 10, Barangay Cugman ning dakbayan samtang ang biktima nailang si Kathleen (bansagon gitago), 19, taga Barangay Carmen ning dakbayan.

Sa impormasiyon nga nahipos gikan sa Police Station 1 sa Divisoria, gibutyag sa biktima nga samtang sakay kini sa public utility jeepney nga Patag liner kalit lang misakay ang suspek kinsa gabalhin-balhin pa kini og gakabit lang sa pasaheroan nga sakyanan.

Swerteng nasapon sa kapulisan ang suspek ug nabawi ang iPhone 7 plus sa biktima nga nagkantidad og P45 mil.

Atol sa pagkasikop niini, sa dihang gisusi ang lawas sa suspek, nakuhaan pa kini og pakete sa gitoohang shabu gikan sa posisyon sa dinakpan.

Sa pagkakaron, nagtingkagol na ang suspetsado sa bilanggoan alang sa tukmang disposasiyon.