Mga trabahante sa Palaña Grocers nabalaka

USA ka trabahante sa Palaña Grocers ang naabtan sa SunStar SuperBalita nga labihan ang dangoyngoy human nasayangan sa ilang gitrabahoan dihang nasunog kini niadtong Miyerkules sa gabii, Hulyo 12.

Si Rachel niangkon sa SunStar SuperBalita nga niadtong Biyernes unta ang ilang kininsina nga sweldo apan nakurat nganong nahitabo ang pag-ulbo sa kalayo.

Matud niini nga wala siya kabalo kon unsay buhaton niining sunog ang ilang gitrabahoan.

"Wala pako kabalo ma’am kay karon man unta among sweldo. Pero sa nahitabo karon dili ko kahibalo masweldohan paba mi. Naa pami bayrunon sa among boarding house... daghan mi utang," matud niini.

Dugang niini nga dili gayud sayon ang masunogan ug sakit iyang buot gumikan kay daw moabot na siya og tulo ka tuig sa grocery isip trabahante.

Si Rachel usa lamang sa gatusan ka mga empleyado sa Palaña Grocers nga nasubo pag-ayo sa nahitabo ug nagbuntag sa sige og sud-ong ug naglaom nga mapalong na ang kalayo.

Kahinumduman general alarm na ang gideklarar sa Bureau of Fire Protection tungod kay naglisod sila sa pagpalong niini.

Gani sa pagsulat ning balita, wala pa na under control ang sunog nga nahitabo kagahapon ug padayon ang pakigbugno sa bombero sa kalayo labina naglisod sila sa pag-penetrate sa ibabaw labina misaka paingon sa Conchita Hotel ang sunog.