Kanhi bise gobernador sa MisOr mipanaw sa edad nga 64

MIPANAW na si kanhi bise gobernador sa Misamis Oriental Norris Babiera niadtong Huwebes, Hulyo 13, alas 10:37 sa gabii sa Cagayan de Oro City Medical Center sa edad nga 64.

Ang anak niini nga si Jim Babiera nibutyag nga ang gikamatyan sa iyang amahan ang stage 4 nga lymphoma, usa ka laing klase sa cancer.

Niaging tuig, gi-diagnose kini og stage 3 sa maong sakit ug gipaubos dayon kini og chemotherapy ug obserbasyon. Ning tuig, nadiskubre nga nag-progress ang gihambin nga sakit niini.

Gani niadtong Hunyo lang gipaubos na usab kini og laing chemo ug tungod kay duna sab laing complication pila ka adlaw giadmit kini sa tambalanan.

Gibutyag niini nga sa pagkakaron ang patay'ng lawas sa amahan ang anaa karon gipahimutang sa Cosmopolitan Funeral Parlor samtang gikatakdang i-anunsyo ang adlaw sa lubong niini.

Ang mga kauban niini kaniadto sa buhat ang nipaabot og dakong pahasubo ngadto sa pamilya sa namatyan.

Si Babiera unang nagsilbi isip kagawad sa lungsod sa Tagoloan Misamis Oriental, nahimong provincial administrator nga miabot sa Sangguniang Panlalawigan member ug nahimong bise gobernador sa Misamis Oriental.

Daw legasiya nga gibilin niini sa lalawigan mao ang limpyo nga pangalan niini nga walay gikalambigitan ug tinud-anay lamang nga serbisyo.