Naglimpyo og exhaust fan nakuryentehan, kritikal

Kris C. Sialana

DAKONG samad sa ulo ang naangkon sa usa ka lalaki human nakuryentehan niadtong Miyerkules, Mayo 17, sa Barangay Macasandig, dakbayan sa Cagayan de Oro.

Giatiman pa sa mga mananambal si Danilo Calisagan, 41, minyo, taga Barangay Bulua ning dakbayan.

Sa impormasiyon nga nahipos gikan sa Northern Mindanao Medical Center (NMMC) ning dakbayan nasayran nga samtang naglimpyo ang maong lalaki sa exhaust fan giingong posibleng ning ground kini hinungdan nga nakuryentehan ang biktima.

Gumikan sa maong pagkakuryentehan niini nakaangkon kini og dakong samad ilabi na diha sa iyang ulo human nga maayong pagkahagsa niini ilabi na diha sa iyang ulo nga bahin.

Dali usab nga gidala sa nahisgutang balay tambalanan ang biktima tungod na usab sa naangkon niini nga samad human nga nagkirigkirig sa dihang nakuryentehan.

Sa pagkakaron, pabilin pa nga gi-atiman sa mga mananambal sulod sa NMMC ang maong biktima.