Lalaki gisuksok ang gatas sa atubangan

Kris C. Sialana

NAGTINGKAGOL ang usa ka lalaki human nga gisuksok ang duha ka pack nga gatas sa iyang atubangan samtang anaa sa usa ka mall nga nahimutang sa JR Borja Street, Barangay 38 ning dakbayan sa Cagayan de Oro

Ang maong dinakpan nailang si Reynaldo (bansagon gitago), 24, minyo nga taga Barangay Kauswagan ning siyudad samtang ang nakamatikod nga guwardiya mao si Bernie Maglasang, 24, ulitawo, taga Barangay 38 ning dakbayan.

Sa nahipos nga impormasiyon gikan sa Police Station 2 sa Cogon, gikabutyag nga samtang anaa sa sulod sa patigayon nga nahimutang sa nahisgutang dapit ang suspetsado gisuksok niini ang duha ka pack nga gatas diha sa iyang atubangang bahin.

Giingong namatikdan kini sa guwardiya nga dili normal ang paglakaw niini ug katahapan ang mga lihok sa dihang paggawas sa maong mall hinungdan nga gisita kini ug nakompirmang aduna kini gipasok sa iyang atubangang bahin hinungdan nga kini gisikop.

Subay pa giingong napugos sa pagpangawat ang suspek kay nanginahanglan kini og kwarta.

Sa pagkakaron, ang maong suspetsado ang kasamtangang anaa sa tinugyanan sa kapolisan.