Mga bus sa Northern Mindanao bag-o

GIPANIGURO karon sa Land Transportation and Franchising Regulatory Board (LTFRB)-Northern Mindanao nga 95 porsiyento sa mga bus nga gabiyahian dinhi sa rehiyon ang bag-o ug maayo ang mga kondisyon.

Si LTFRB Regional Director Aminoden Guro nibutyag nga sagad sa mga bus sa rehiyon 2015-ngadto 2016 model pa.

Ila sab gipaniguro nga tanan bus nga miabot na og 10 ngadto 15 ka tuig nga gabiyahian ang dili na pwede nga i-renew ug gamiton tungod kay kini maoy labing delikado sa mga disgrasya sama sa mga wad-an ug preno ug uban pa.

Gani bag-ohay lang gipatuman usab sa LTFRB ang bag-ong circular memorandum ngadto sa mga driver nga kutob ra sa unom ka oras ang biyahe ug pag-abot sa unom ka oras kinahanglan aduna na kini relibo nga laing driver.

Matud ni Guro nga kon moabot ngadto sa walo ug napulo ka oras ang biyahe sa bus kinahanglan na kini og kaubang driver nga mopuli niini pag-abot sa unom ka oras.

Usa sa hinungdan sa disgrasya kining mga makakatulog nga driver gumikan sa kakapoy.

Buot ipaniguro ni Guro nga luwas ug layo sa aksidente ang mga bus lakip ang mga sumasakay niini.

Kahinumduman moabot sa 34 ka mga tao ang namatay sa pagkahulog sa bus sa pangpang nga bahin didto sa Isabela ug bout ni Guro nga dili kini mahitabo dinhi sa rehiyon.