Lalaki giluba, kritikal

Kris C. Sialana

UBAY-UBAY ka mga samad ang naangkon sa usa ka lalaki human gidunggab sa wala mailang suspetsado niadtong Huwebes sa gabii, Abril 20, sa Agora, dakbayan sa Cagayan de Oro.

Kritikal karon ang kahimtang ni Rey Amit, 30, minyo, residente ra usab sa susama nga dapit.

Sa nahipos nga impormasiyon gikan sa Northern Mindanao Medical Center (NMMC) ning dakbayan, nasayran nga samtang anaa sa maong dapit ang biktima kalit lang kining giduolan sa wala mailang suspetsado.

Giingong wala masuta sa pamilya sa biktima kung unsa ang motibo sa pagpangdunggab gumikan kay kalit ang maong hitabo.

Nakaangkon og ubay-ubay ka mga samad dinunggaban sa nagkadaiyang parte sa kalawasan ang biktima hinungdan anaa kini karong panahona sa talandugon nga kahimtang tungod sa mga samad ginamit ang wala masutang klase sa hinagiban.

Sa pagkakaron, ang suspetsado ang pabiling gawasnon samtang ang biktima ang anaa pa usab sulod sa emergency room sa NMMC kinsa padayong gi-obserbahan sa mga mananambal.