Pag-oktaba sa eleksyon kinahanglan madesisyonan na

MALAUMON si Commission on Election Regional Director Renato Magbutay nga kon i-oktaba o i-postpone ang Barangay ug Sangguniang Kabataan (SK) Election karong Oktubre kinahanglan nga madesisyunan na kini sa dili pa ang bulan sa Hunyo.

Matud ni Magbutay nga kon moabot pa sa Hulyo lisod na kaayo alang kanila sa pagpangandam labina nga kasado na ang calendar of activities alang sa gikatakdang eleksyon.

Gani andam na ang mga petsa kon madayon gayud ang eleksyon labina wala pay abiso ug desisyon gikan sa kaulohan.

Magsugod ang election period sa Septiyembre 23 ngadto petsa 30 diin mao sab kini nga mga adlaw ang filing of certificate of candidacy sa mga mokandidato sa pagkakapitan ug kagawad ingon man pagka SK.

Ang kampanya kon campaign period magsugod sab sa October 13 ngadto 21, wala nay kampanya sa petsa 22 tungod kay pagka petsa 23 mao ang Barangay Election day.

Manual lamang ang gamit sa eleksyon ug ideklara ang mga mananaog mismo sa ilang barangay lamang.

Matud ni Magbutay nga sa pagkakaron padayon ang ilang pagdawat sa mga nagparehistro ug unta dili na mohulat og deadline ug hatagan og higayon karon panahona labina dili pa kaayo daghan tao ang gaparehistro. (SVB)