Manimbahay sa Katoliko miubos?

MIHATAG og reaksyon ang simbahang katoliko sa migawas karon nga survey nga daghan sa mga Katoliko ang dili na kaayo mosimba human ubos kaayo kini kon itandi sa laing mga relihiyon.

Si Monsignor Precious Cabunoc, kura paruko sa St. Augustine Cathedral Church nisulti nga daghang sirkumstansya nganong anaay pagkunhod sa mga manimbahay karong panahona.

Gani namatikdan niya mismo niadtong kasaulogan sa Semana Santa nga taliwala daghan tawo ang makita sa simbahan apan usa sa galisod sa pagsulod ang katawhan tungod sa mga dalan nga daghang gisirado ug maglisod sa kaparkingan.

“Tungod sa kahigpit sa security nga daghan mga dalan gisirado dili diretso makaadto sa simbahan tungod kay rekisahon pa. Ipangbilin pa ang mga sakyanan, bisan asa nalang moadto malimitahan ang kadaghananon,” matud ni Cabunoc.

Tungod usab sa pag-ulbo sa teknolohiya daghan sa katawhan ang nipokos na niini ug usahay makalimtan na ang senimanahang relihiyosong kalihokan.

Hinuon gibutyag ni Cabunoc nga dili apektado ang simbahan niini tungod kay sila mismo dili man gapugos kung kinsa ang mosimba og dili.

Nanghinaot lamang kini sa katawhan ug romanong katoliko nga seryosuhon ang ilang pagtuo tungod kay bukas kanunay ang simbahan alang kanila.

Dili usab kini angayan ikumpara sa laing relihiyon gumikan kay sayod ang tanan nga midominar ang romanong katoliko dinhi sa nasod.

Survey

Sa gipagawas nga resulta sa Social Weather Survey moabot sa 48 porsiyento sa mga pinoy ang mosimba matag-semana diin 17 porsiyento ang talagsa lang.

Sagad sab sa tubag nga moabot sa 85 porsiyento niingon nga importante ang relihiyon alang kanila ug 15 porsiyento lamang ang niiningon nga dili kini importante alang kanila.

Basi sab sa survey ang pinakadaghan og manimbahay mao ang miyembro sa Iglesia Ni Cristo nga adunay 90 porsiyento, gisundadn sa Muslims nga 81 porsiyento, laing Christians nga 71 porsiyento, ug Catholics nga 41 porsiyento lamang.

Hinuon sa latest nga 41 porsiyento nga church attendance sa Catholics sa March 2017 mao ang 2 points above lamang kon itandi sa 39 porsiyento niadtong tuig 2013 ug 2014.

Gihimo ang survey niadtong March 25 hangtod 28 diin pinaagi sa face-to-face interview sa 1,200 ka mga adults ug 18 anyos pataas sa tibuok nasod.