16 anyos gitulis, giluba sulod sa dyip

Kris C. Sialana

GITULIS ug giluba sa tulisan ang usa ka 16 anyos samtang sakay sa Patag Liner sa Cruz-Taal Streets, dakbayan sa Cagayan de Oro.

Ang biktima naila nga si Xcel (bansagon gitago), 16, taga llaya Street, Barangay Carmen ning dakbayan.

Sa nahipos nga impormasiyon gikan sa Police Station 1 sa Divisoria gikabutyag nga pauli na ang biktima niadtong higayona sakay sa Patag liner nga dyip dihang nisakay usab ang unom ka mga lalaki nga gidudahang mga rugby boy.

Usa sa mga suspek ang diretso nga mibira sa bag sa biktima dayong luba usab ang laing suspek.

Human sa maong insidente dali usab nga mikana-og gikan sa maong dyip ang unom ka mga suspetsado dayong sibat.

Nakaangkon ang maong menor de edad og samad sa iyang paa kinsa dali usab nga gidala sa Northern Mindanao Medical Center sa mga nirespondeng kapolisan sa Police Station 1.

Sa pagkakaron, padayon pa nga nagpaalim sa samad nga naangkon ang biktima samtang ang mga suspetsado ang gawasnon pa karong mga panahona.