Luzano: Korte Suprema...Nangeddengen Pabor Kenni Poe!

Jimmy Luzano

ITAY nabiit, kalpasan iti naunday a panawen a nagur-uray ti sangapagilian... nangeddeng met laengen ti Korte Suprema panggep iti petisyon kontra iti panagtaray ni Sen. Grace Poe iti kina-presidente. Nabatad ti pangeddeng ti siyam (9) a Mahistrado kontra iti ennem (6) a kimmontra. Kayatna a sawen: legal a makataray iti kinapresidente ni Poe. Iti benneg dagiti Poe ken supportersna... nasirnaaten ti dalan nga inda dalanen. Awanen dagiti siit a mangpuris iti gartem ni Poe nga agsirbi via Malakanyang. Iti met benneg dagiti kontra, natural a dismayadoda. Numona kano ta saan nga inlawlawag ti SC no apay a pinaburanda ni Poe. Uray pay ni P-Noy ket mamati kano a masapul a madiskwalipika koma ni Poe. Ngem ti anglitna... uppat kadagiti ennem nga appointeesna iti Korte Suprema... ket pimmabor kenni Poe. Tsk tsk! Kasta a talaga ti biag. Kasla bola. Maminsan, addaka iti ngato. No maminsan addaka iti sirok. Ti dakes... no idi nagpababa ka ket na-flat pay!

***

Pinaglibkan ti Malakanyang ti alegasyon ni Prof. Rizalito David nga adda kano pakainaigan ti Malakanyang iti desisyon ti Korte Suprema a pimmabor kenni Poe. Awanan kinapudno ken maysa a kina-irresponsable ti nakuna a basnot ni David, a maysa met kadagiti petisyoner ni Poe. Sabagay no intay aganalisar... ni Mar Roxas ti manok ti Malakanyang saan a ni Poe. Ta ania koma ti maitulong ti SC ruling iti kandidatora ni Mar kas pangarigan? Awan, saan aya? No di ketdi ti napaboran ket ni Poe a mismo. Ti ketdi nasiripmi... igaed ketdi ti administrasyion ti agkampanya agsipud ta mabalin a plus factor kenni Poe ti Court ruling. No para met kadagiti dadduma a kandidato iti para presidente... masiguromi nga adda met epektona kadakuada. Mabalin a naklaatda ngem mabalin met a saan. Ngem aminenda man wenno saan... nanayunan ti amakda iti ipipigsa pay ti karisma ni Poe kadagiti umili kas mainayon iti dinto kalipatan a karisma ti amana a ni FPJ. Kuna met dagiti kontra-Poe: ta ania met koma ti pagsammakedanna nga eksperiensia iti serbisyo-publiko ket bagito pay laeng a senador? Ta ania met koma ti maipagpannakkelna a serbisyo ti amana a ni FPJ ket iti laeng met kano pelikula ti naglainganna? Kakasta ken dadduma pay a komento ti kellaat a riimmuar gapuy laeng iti SC ruling. Hay naku... biag Pinoy!

***

Adda kano plano nga ipaimpeachda dagiti siyam a Mahistrado ti Korte Suprema a pimmabor kenni Poe. Hanyaaa? Este Aniaa? Paimpeachda dagiti Mahistrado? Sus ginoo! Sabagay, adda amin karbengantayo iti bukodtrayo nga opinsyon ken prinsipyo. Kuna ngamin ni Dean Amado Valdez, maysa kadagiti nagpetisyon kontra Poe, mabalin kano a makassuan dagiti Mahistrado iti betrayal of public trust ken culpable violation of the constitution. Dayta ti panirigan ni Valdez. Ngem iti sabali a benneg, kuna met dagiti dadduma nga analysts: imposible met nga inosente dagiti siyam a Mahistrado iti linaon ti konstitusyon sakbay a nangeddengda. Imposible met a dida ammo ti ar-aramidenda sakbayda a nangeddeng. Tsk tsk... talaga a kasta ti biag. Narigattayo ti umawat iti pannakaabak wenno umako iti biddut. Tay kunadan... adu kadatayo ti nangato ti pride-na. Mamatiak iti dayta ta isu ti sangkaibaga idi daydi lolok: Ti pride apok, kunana... ket mayasping iti pantalon... NO BIMMABA... ADDA DAKES A MAPASAMAK! Isu a dida kayat a bumaba ti pride-da ta katukadna ti pannakaibabain (kano) wenno pannakaipababa ti dignidad. Ala, padaanantayo laengen no anianto ti pagnaan dagita a plano ken addang. Kunada ngaruden... ti Pilipinas... namnamsek iti kontrobersiya. No awan kontrobersiya, amangan ta malipatandan a karamantayo iti mapa ti lubong.

***

Gapu iti pannakaited iti legaledad iti panagtaray ni Poe iti kina-presidente... nagsisipol dagiti reaksiyon dagiti umili manipud nagduduma a rehiyon ti pagilian. Adda agkuna a mas napigpigsa kano manen daytoy kontra kadagiti kabalubalna. Asideg kenni Poe ni Binay kadagiti surveys... kurangda la ti agtablan kas met kada Marcos ken Chiz. Adda met agkuna nga: amangan ta adda kano nagna nga impluwensiya wenno under the table arrangement. Adda met agkuna a dayta ket paset kano ti plano tapno kumapsot ni Mar. Ngem ti kadagsenan ken makakigkigtot a reaksiyon ket daytoy: No pudno ti alegasyon idi a ni Poe ket anak daydi Pres. Marcos... kaawatan ngarud a makasublin idiay Malakanyang ti dara’t Marcos?? Ket no ti mangabak a president ket ni Poe ket ti bisena ket ni Bongbong Marcos... kayatna a sawen dua a Marcos (agkabsat) ti agpa-Malakanyang???? Saan ngata a kasla agsingin a tungpa ti impala-amda iti Aquino??? Kaam-amak a pattapatta, pards no dagita ket pumudno. Ngem pattapatta wenno pangngarig laeng. Ngamin no intay lagipen... agraratip dagiti addang a napasamak tapno mapadisi laeng ni Poe ikadagiti tumartaray iti kina-presidente. Ta apay? Kunada idi a kurang iti eksperiensiyana... ngem apay a kasla kaamakda a makalaban? No kunada nga ubing pay iti pulitika... apay a kaamakda a tumaray ket pinilaanda iti kaskaso? Kayatna kadi a sawen a napigsa daytoy a kalaban? Wenno adda pay mas naun-uneg a makagapu? Pards... sikan ti mangamiris. No siak... he he... diak kayaten ti ma-LBM... gapu’t kontrobersiya.

***

Nagyaman ni Ms. Susan Roces, pannakaina ni Grace... kadagiti nagpetisyon kontra iti panagtaray ni Poe. Imbes a kaungetna ida, saan, ta nagyamananna pay ketdi ida. Kinuna ni veteran actress Susan Roces: “Maraming-maraming salamat po sa inyo na nagsampa ng mga demandang ito. Tinatanaw kong utang na loob kasama ng lahat ng “pulot” sa buong Pilipinas dahil nagkaroon ng boses ang lahat ng katulad ng anak ko. Wala na akong ibang masabi kundi maraming salamat sa inyong mga dalangin. Patuloy akong nananalangin na maging karapat-dapat si Grace sa kung anuman ang landas na tatahakin niya. Ang ipinaglalaban ni Grace at ako ay mga karapatan ng mga bata na katulad niya. Hindi lamang karapatan ni Grace, hindi lamang ang pagtakbo bilang pangulo, kung hindi ang karapatan niyang maging kapantay ng lahat.” No intay amirisin wenno ibuksilan ti nakuna ni Susan... inikkanna iti importansiya ti karbengan dagiti napidpidot ken taraken nga ubbing a kas kenni Grace nga agbiag a kas met kadagiti addaan nataudan a nagannak a nangtagibi kadakuada. ...in short: patas a karbengan iti biag ditoy ayantayo a kagimongan.

***

Iti sabali a benneg... inyussuaten itay nabiit ti SOCOB wenno ti Society of Outstanding Citizens of Baguio ti Seach for Outstanding Citizen para iti sumuno a selebrasyon. Daytoy ket naangay iti Multi-Purpose Building ti City Hall a tinabunuan dagiti opisyales ti siyudad opisyales ti SOCOB ken kameng ti media. Naiparang met dita dagiti baro a kameng ti SOCOB. Ket kadagiti kayatda ti manginominar, makaala iti porma manipud opisina ni Mayor Mauricio Domogan, maysa met a Socob Member. Maulit a ti pannakabalangat dagiti mapili ket kas panangbigbig iti local a gobyerno kadagiti naaramidanda iti bukodda a serbisyo para iti siyudad. Yamanentayo manen ti itatabunoyo iti nakuna nga okasyon. Adios mi amor, ciao, mabalos!